Villfalt vun Themen an Mechaniken, mee leider schlecht emgesaat

Vun der Spillrei Unlock ginn et momentan 4 verschidde Boxen. An all Box fannt dir 3 verschidde Fäll, déi et ënnerhalb vun enger Stonn ze léise gelt. Et ginn déi verschiddenst Fäll: vu klasseschen Escape Rooms bis hin zu Point and Click Adventures ass alles dobäi. Thematesch kennt och jiddereen op säi Goût: Dir wëllt op Tauchstatioun goen, e Pirateschatz sichen oder awer léiwer engem verréckten Dokter entkommen? 

All Fall besteet aus engem Kaartestaapel an et kritt een ausserdeem eng App zur Verfügung gestallt, wou ee Léisunge vun de Rätselen agëtt. Bei Unlock ginn et verschidde Kaarten. Et gi Code Kaarten, fir déi een e Code erausfanne muss an an der App a gëtt. Et ginn och Maschinen, déi een an der App notze kann. Ausserdeem ginn et Kaarten déi Uertschaften oder Plazen duerstellen. Do fënnt een oft Hiweisen op nei Kaarten. Dei lescht Zort Kaarte sinn "Puzzle" Kaarten. Dei muss ee jeeweils mat enger aner Kaart verbanne fir weider ze kommen. Et duerf een als Team ëmmer just déi Kaarten opdecken, déi een ugewise kritt oder déi mat der Nummer, déi een duerch e Rätsel erausfonnt huet. An der App kann een sech awer och Tipps ukucken, falls ee mol net weider kennt. 

Ausserdeem ka jiddereen sech am Viraus d'App downloaden. Do fënnt een och eng Demoversioun, déi aus engem kuerze Fall besteet. Dëst ass eng gutt Méiglechkeet sech een Iwwerbléck vun der Spillmechanik ze verschafen. 

Klengen Tipp: Kaaft iech d'Spill gebraucht. Bei Unlock muss een näischt futti maachen oder bemolen. Eng Box kascht em déi 30€ , wat ech fir een eemolege Spillspaass ze deier fannen.